Hip og cool

Enn en breytingin

Fri, 04 Jan 2008 11:12:48 GMT

Nýtt blogg kæru vinir:

www.brynhildur.blog.is

Nú árið er liðið

Wed, 02 Jan 2008 20:36:21 GMT

Jæja nú er ég komin aftur úr óformlegu pásunni minni :)

Hef haft alveg nóg að gera síðan yndisdúfan mín kom í heiminn þann 24. ágúst síðast liðinn. Daman er algjört yndi, blíð og góð, róleg og hraust, með skap og veit hvað hún vill. Hún stækkar ótrúlega hratt og getum við ekki beðið eftir að fara með hana í fimm mánaða skoðunina þann 16. janúar - sjá hve löng og þung hún er orðin.

Eftir að Æsa kom í heiminn finnst mér eins og hafi verið fyllt upp í tómarúm í hjarta mínu, eins og ég hafi loks hitt einhvern sem ég hef verið að bíða eftir. Alveg magnað að fá í hendurnar einstakling sem maður þekkir ekki en finnst maður þekkja svo vel, þurfa að læra inn á þarfir hans og langanir. Ég er hrikalega þakklát fyrir að hafa fengið að kynnast Æsunni minni því hún gefur mér svo mikið. Og ekki nóg með að maður hafi bara kynnst yndisdúfunni heldur höfum við mæðgur verið svo heppnar að kynnast hóp af nýjum vinum. Einu sinni í viku hittumst við 6 konur hér á Selfossi með ágústkrílin okkar...og lifum við hér um bil fyrir þá vikulega hittinga. Eins höfum við kynnst heilum haug af Ágústmömmum (sem eru reyndar líka júlí- og septembermömmur) og átt með þeim góðar stundir á árinu ásamt krílunum þeirra. Frábær hópur kvenna og flottustu börnin.

Í það heila var síðasta ár dásamlegt og hef ég fulla trú á að það næsta verði jafn gott ef ekki betra. Sem heimavinnandi kona ætla ég að vera duglegri að blogga núna en ég hef verið undanfarið, hef orðið betri tíma til þess :)

Gleðilegt nýtt ár öllsömul!

Ný slóð

Mon, 17 Sep 2007 15:16:14 GMT

Erum búin að breyta slóðinni á síðuna hennar Æsu. Glatað að vera með ljónalingstitil þegar daman er meyja :D

Nýja slóðin er: www.aesa.barnaland.is

Nú er þetta að bresta á

Tue, 21 Aug 2007 19:05:52 GMT

Jæja ekki er Ljónynjan enn komin í heiminn. Hins vegar hefur verið ákveðið að líða ekki svona leti og verð ég gangsett annað kvöld. Mæti upp á fæðingargang kl. 21.

Því er nær útilokað að Ljónynjan litli verði ljón :D Fimmtudaginn 23. ágúst, um miðjan dag tekur meyjarmerkið við og eru allar líkur á að skottið fæðist því undir merki meyjunnar. Hafið þið vitað hallærislegri Ljónynju? 8)

Það er alla vega bókað mál að næst þegar ég skrifa hér á síðuna að þá verður Ljónynjan fædd...eða ætti ég frekar að segja Hafmeyjan?

Vonandi að fara að bresta á!

Fri, 03 Aug 2007 10:55:10 GMT

Jæja, var að koma úr skoðun - 39v2d í dag.

Hafði lést um næstum hálft kíló síðan í síðustu skoðun, sem mér finnst magnað því ég hef borðað eins og svín milli skoðanna. Reyndar er bjúgurinn minni núna en þá svo það hlýtur að vera skýringin. Blóðþrýstingurinn hjá mér er 120/75, ekkert í þvaginu frekar en fyrri daginn og rétt örlar á bjúg. Legbotninn orðinn 42 cm og hjartslátturinn hjá "Ísbjörgu" er 140-150 slög á mínútu. Hún er enn í höfuðstöðu og búin að koma sér neðar í grindina en ekki búin að fastskorða sig svo ég þarf að hringja á sjúkrabíl ef ég missi vatnið.

Miðað við fyrirvaraverki undangenginna daga vildu ljósmóðir og læknir meina að ég væri að fara að hrökkva í gang. Læknirinn þreifaði á leghálsinum og er ég komin með 1-2 í útvíkkun. Hún hreyfði við leghálsinum og belgnum og sagði að núna gæti ég farið að fara af stað en svo gæti líka liðið einhver tími. Ég ætla bara að vera cool og calm, og reyna að gera mér engar vonir Finn það samt núna að ég er með meiri túrverki en áður svo það gæti allt gerst. Ég hef sagt það frá því fyrir getnað að þetta barn kæmi um Verslunarmannahelgina svo ég gæti mögulega haft rétt fyrir mér

Leyndarmálið

Fri, 20 Jul 2007 00:53:40 GMT

Er djúpt sokkin í bókina um Leyndarmálið aka The Secret. Þar er talað um margt og mikið en undirtónninn er sá að til að laða að sér það sem maður þráir þarf maður að hugsa jákvætt. Og til að geta hugsað jákvætt þarf manni að líða vel. Það er t.d. ógerlegt að líða illa en ætla sér samt að hugsa jákvætt.

Í bókinni er mælt með að hver og einn komi sér upp leynitrixi þegar honum líður illa. Finni sér eitthvað ákveðið sem fær viðkomandi til að líða vel, góð minning, fyndið móment eða what so ever.

Ég ákvað að koma mér upp svona trixi og var ekki lengi að finna mitt trix Mundi eftir dálitlu sem kom upp á þegar ég var í Kennó sem fær mig alltaf til að hlægja og ætla að deila því með ykkur.

Þá hefst "lesturinn"! Þegar ég var í Kennó unnum ég og Ásdís vinkona öll okkar verkefni saman. Eyddum því dágóðum tíma námsáranna í tölvuveri skólans. Það var fastur liður hjá okkur að hlamma okkur niður við sitthvora tölvuna og byrja á að logga okkur inn á msn-ið. Til að geta gert það urðum við að fara á slóðina www.msn.com - en dag einn sló Ásdís á rangan takka í staðinn fyrir s-ið. Hún hitti semsagt á ´e´ og fékk þá slóðina www.men.com og ég mæli með að þið ýtið ekki á linkinn!! Hún fékk upp þvílíkt svæsna klámsíðu sem var ætluð samkynhneigðum karlmönnum að mestu. Mér fannst þetta hrikalega fyndið og byrja að skellihlægja. Torfi tölvukennari var staddur þarna og spyr hvað sé svona fyndið og við erum snöggar að svara honum að það sé í raun ekkert merkilegt. Þegar Ásdís slær á krossinn í hægra horninu til að loka síðunni poppar upp minni gluggi með mynd af karlmanni sem var með gulan hjálm með ljósi á, á höfðinu, og smíðavesti um mittið en ber að öðru leyti. Í hægri hendinni hélt hann svo á beinstífum vininum. Þetta var gjörsamlega til að fá mig til að tjúllast úr hlátri. Aftur byrjar Torfi að forvitnast og við náum að eyða því. Þegar vinkona Ásdís ætlar að loka pop-up glugganum byrjaði svo ballið. Hún gat það ekki með nokkru móti og var það bara til að æsa upp í mér gólin og nú voru allir í tölvustofunni farnir að mæna á okkur. Ég næ að stynja upp að kannski sé best að hægrismella músinni á pop-up gluggann og ýta á Close. Hún prófar það en tekst ekki betur en svo að hún hittir á Set as a background og með því var myndin af folanum orðin að bakgrunni á Desktoppnum. Sama hvað hún reyndi svo þá gat hún ekki skipt um background! Þarna var ég orðin máttlaus af hlátri og byrjaði að renna niður af stólnum og lá í gólfinu emjandi af hlátri. Heyrði svo Torfa segja: "nei nú verð ég að koma og sjá hvað er svona fyndið!" um leið og hann þýtur af stað til okkar. Hafði aldrei séð Ásdísi eins snögga að logga sig út úr tölvunni og hlaupa yfir að annarri áður en karlinn kom en ég man að það tók mig langan tíma að geta staðið upp á ný, og var ég með nokkra pissudropa í nærbuxunum.

Nú er ég komin í biðstöðu

Sun, 15 Jul 2007 14:21:53 GMT

Jæja nú eru bara 24 dagar í áætlaðan dag fæðingar. Það er nú ekki mikið. Ef ég geng svo fram yfir eru mest fimm og hálf vika í Ísbjörgu - og vitið þið hvað ég var að gera fyrir fimm og hálfri viku? Þá hélt ég afmælissaumó ásamt Arngunni heima hjá henni!!!! og það var í gær 8| Barnið er svo gott sem komið í heiminn ef tíminn verður jafn fljótur að líða.

Mig dreymdi stórskemmtilegan draum í nótt. Mig dreymdi að ég hefði fætt stúlkuna mína og var dagsetningin 29. janúar. Fór með hana í heimsókn til mömmu og spurði hún mig hvenær hún hefði fæðst og ég sagði henni það og bætti við: "ég sagði ykkur að hún myndi koma fyrr!"

Svo mætti ég til vinnu (starfaði sem þjónn á kaffihúsi :o) og þar var maður sem sagði: "bíddu fyrirgefðu, sagðist þú ekki hafa verið að eiga? ég get ekki betur séð en að þú sért enn kasólétt" Ég var svo sár út í hann fyrir að kommenta á það hvað ég væri feit en allt í einu var ég komin upp á spítala að fæða á ný og fékk aðra stelpu. Hún fæddist skælbrosandi og hjalandi og var þvílíkt kát. Við Eggert fórum í það að setja á hana bleyju og vildum endilega finna nafn á hana strax - okkur fannst ómögulegt að bíða með það. Þá heyrðist rödd sem virtist koma frá barninu, segja eitthvað í þá veruna að barnið ætti að heita eða það vildi sjálft heita Ólöf Sara og létum við slag standa :D

Annars er ansi margt tilbúið hér á bæ. Er núna að þvo öll fötin hennar sem eru úr ull, öll önnur eru orðin hrein. Eigum eftir að setja saman skiptiborðskommóðuna og þá get ég farið að stöffa í hana. Allt annað er komið í bili, fyrir utan að við ætlum að kaupa bráðsniðuga vöggu fyrir hana. Eyþór og Arna keyptu þannig fyrir prinsinn sinn, svaka flott - eitthvað annað en bambusinn sem hefur verið við stjórnvölinn í gegnum tíðina :)

Megið endilega kíkja á allar myndirnar sem ég hef verið að setja inn á www.baugstjorn28.barnaland.is, www.agneshalla.barnaland.is og www.ljonalingur.barnaland.is (undir Bumbumyndir). Er aðeins duglegri við að setja inn myndir heldur en að blogga :$

Smá innskot

Tue, 03 Jul 2007 21:03:40 GMT

Er komin með eitt blogg í viðbót - svona mér til skemmtunar. Megið vera dugleg að kíkja á það og aldrei að vita nema ég verið dugleg að henda einhverju áhugaverðu þar inn 8)

Aukabloggið mitt

Játningu takk

Wed, 27 Jun 2007 18:02:10 GMT

Hef tekið eftir að það eru um 100 manns að skoða bloggið mitt daglega, samt fæ ég sárafá komment á það sem ég skrifa. Nú er ég forvitin að vita hverjir eru að skoða reglulega. Allir sem koma reglulega hingað inn EIGA því að kommenta á þessa færslu :D Algjört möst að vita hver er að skoða það sem maður skrifar ;)

Dauði og djöfull

Tue, 26 Jun 2007 11:50:26 GMT

Djöfulsins viðbjóður :!: Mætti kl. 8 í morgun niður á sjúkrahúsið á Selfossi til að fara í sykurþolsprófið. Þurfti að fasta frá kl. 22 kvöldinu áður. Ég var búin að heyra margar hryllingssögur af téðu prófi og átti því ekki von á góðu. Skilaði inn þvagprufu og svo var tekið úr mér blóð. Við fyrsta sopann hugsaði ég með mér að þetta væri ekki svo slæmt, fékk mér annan sem var verri og enn annan sem var enn verri. Var við það að æla á þessum tímapunkti. Meinatæknirinn mælti með því að ég myndi bara demba þessu í mig. Ég fór í gamlar drykkjukeppnisstellingar og hellti viðbjóðnum í mig og munaði bara hársbreidd að allt færi til baka á gólfið...en ég vann keppnina 8)

Var svo látin bíða uppi á setustofu í klukkutíma. Hafði haft vit á því að taka með mér prjónana og bók til að drepa tímann. En ekki var Adam lengi einn í Paradís..var komin á fullt í vinnu á sjúkrahúsinu. Gömul kona í hjólastól snéri mér þvílíkt í kringum sig og var ég í óðaönn að færa til stóla og keyra hana milli staða til að sem best færi um hana. Lenti einmitt í þessarri sömu í janúar þegar ég þurfti að fara á 8 tíma fresti upp eftir til að fá sýklalyfið í æðina. Í janúar hafði ég fengið nóg af henni, endaði með að hvæsa eitthvað á hana og var svo í felum á bak við vegg svo hún sæi mig ekki restina af meðferðinni. Að klukkutíma liðnum þaut ég niður í næstu blóðprufu. Vildi meinatæknirinn endilega taka blóð úr hinum handleggnum en það tókst ekki með nokkru móti. Vildi ekkert blóð koma þaðan. Varð því að stinga aftur í sama stungusárið á þeim vinstri og oh man hvað það var vont :!: Tók hún önnur tvö glös og var ég þá send upp aftur með þau skilaboð að koma niður að klukkutíma liðnum.

Þegar upp var komið treysti ég mér ekki í meiri vinnu svo ég sat frekar frammi á gangi heldur en í setustofunni. Beið þar í klukkutíma, var orðið þvílíkt óglatt af öllu saman, búið að taka 4 glös af blóði og með fastandi magann fullan af sykurleðju. Stundi og rumdi, réri mér til og frá og taldi mínúturnar. Loks kominn tími til að fara niður :!: Enn var stungið í sama sárið og sjitt + fokk hvað það var vont. Sex glös af blóði, ég kríthvít með æluna kitlandi kokið. Brunaði heim þar sem ég ældi eins og múkki og líður vægast sagt illa núna. Hef ekki lent í öðrum eins viðbjóði síðan Ingólfur nam land. Saltaða Egilsdjúsið sem var pínt ofan í mann í Löggu og bófa sumarið 1984 smakkaðist eins og eðal-guðaveigar við hlið þessa hroðbjóðs :evil:

Þotin fram að æla 8|

Það er komið sumar, sól í heiði skín

Sat, 23 Jun 2007 21:40:52 GMT

Svakalega er gott veður í dag! Skrapp í heita pottinn í ca 7 mínútur og tókst að brenna eilítið - ekki gott mál.

Fór í skoðun í gær - getið lesið um það hvernig gekk á síðunni hennar Ljónku: http://www.ljonalingur.barnaland.is/vefbok/

Nú hef ég verið þrítug í rúma viku og finnst það ekkert svo slæmt ;) græddi alveg fullt af afmælisgjöfum. Fékk KitchenAid og hakkara frá Eggerti, bækurnar Ætigarðurinn og Upphafið frá börnunum, 20.000 kr frá ma og pa, tvo miða að eigin vali í Borgarleikhúsið frá Magga, Jenny og Aþenu Uglu, slökunargeisladisk frá Arngunni og co, 17.000 kr gjafabréf í Kringlunni frá Ghettó-saumónum og keypti ég 6 bækur í Betra lífi og geisladiskinn sem ég talaði um hér á blogginu, hálsmen frá stelpunum í Ljósheima-saumónum, fallega bleika tösku frá afa og ömmu styttu af Maríu mey frá tengdó og ofsalega fallega uglu í safnið frá Villu og co. Nota tækifærið og þakka kærlega fyrir mig - skammið mig bara ef ég hef gleymt að minnast á einhverja gjöf :D

Á afmælisdaginn minn fengum við svo afhentan sumarbústaðinn sem við vorum að kaupa með tengdó. Er hann staðsettur í Borgarfirði, slétta 13 km frá Borgarnesi. Getið skoðað myndir af honum á myndasíðunni okkar - www.baugstjorn28.barnaland.is/album. Bústaðurinn "heitir" Akurgerði en finnst mér ekkert svo ólíklegt að hann fái annað nafn. Einhverjar hugmyndir??? Við fórum strax í bústaðinn um síðustu helgi og hélt ég eitt stykki kaffiboð þar í tilefni afmælisins.

Annars er allt fínt að frétta af mér. Er skyndilega óeðlileg orkumikil og þar sem grindin er mun betri er ég loks farin að geta gert ýmsa hluti sem ég átti erfitt með. Þvílíkur lúxus að geta loks tekið til og þvegið þvott. Kom snemma heim í gær og fór strax á fullt. Ákvað að búa til fiskbollur með nýju hakkavélinni og kjúklingabaunabuff. Um leið og ég hafði búið til fisksullið og kjúklingabaunamaukið hringdi Eggert með þá hugmynd að kíkja upp í bústað. Mér leist bara vel á það en þá varð ég sko heldur betur að setja allt á fullt. Reif fram allar fjórar pönnur heimilisins og steikti bollur á öllum hellunum og var með þrjár plötur með buffunum í ofninum á sama tíma. Var algerlega löðursveitt og gat sett mig í spor þeirra sem vinna á vinsælum veitingarhúsum. Meðan á þessarri matargerð stóð var ég líka á fullu að troða í þvottavélina og þurrkarann fyrst ég hafði á annað borð byrjað á því dæmi og svo þurfti auðvitað að skella í uppþvottarvélina því ekki langaði mig að koma að eldhúsinu í ógeðslegu ástandi. Þegar Eggert kom loks heim var ég tótalí búin á því og var kærkomið að komast í bústaðinn í afslöppun.

Ég á afmæli í dag, ég á afmæli í dag...

Fri, 15 Jun 2007 15:47:50 GMT

Úff ég er orðin þrítug :S 8| :lol: Kem með djúsí afmælisfærslu þegar ég er komin yfir mesta sjokkið :!:

Nú er ég lasin!!!

Mon, 11 Jun 2007 10:09:08 GMT

...ekki í bókstaflegri merkingu heldur meira svona "friðlaus og spennt"-stemmning. Komst nefnilega að því að í haust er að hefjast hrikalega spennandi nám sem ég verð að fara í! Er hreinlega búin að bíða eftir að eitthvað svona komi hingað til lands:

Heilsumeistaranám á Íslandi

Nám í náttúrulækningum – HEILSUMEISTARANÁM á Íslandi

School of Natural Medicine á Íslandi (SNMÍ) býður uppá einstaklega djúpt nám í almennum náttúrulækningum sem færir nemundum fjölbreytta færni til að verða sannir meistarar í náttúrulegri heilsu og heilun.

Heilsumeistaranám SNMÍ er 3ja ára nám og hefst haustið 2007. SNMÍ hefur verið með reglulega kennslu hérlendis síðastliðin 10 ár og útskrifaði m.a. fyrstu íslensku lithimnufræðingana árið 2000.

Heilsumeistaranám er heiti námsins en erlend starfsheiti eftir sambærileg nám er Naturopath eða Heilpraktiker. Kennslan fer fram á þremur árum með kennslulotum vor og haust og heimanámi.

Allir nemar byrja námið á því vinna með eigin heilsu (Self Healing module) undir leiðsögn Dr. Faridu Sharan og kennara námsins, þessi sjálfsvinna heldur áfram í gegnum allt námsferlið.

Meistaranám í náttúrulækningum / heilsumeistaranám spannar víðtæk greiningar- og meðferðarform sem nýtast í ráðgjöf og meðferð sem sniðin er að mismunandi þörfum í átaki og heilsuvernd fyrir hvern og einn.

SNMI er einstakur skóli í náttúrulækningum sem styðst við hraðnámstækni og fjölgreindarþætti manneskjunnar í kennslu námsefnis auk þess sem nemandi tileinkar sér þekkinguna í gegnum það að vinna með eigin heilsu.

Innihald námsins byggist á samþættum kennslulotum;

1. Master Iridology - Lithimnufræði; fjarnám, verkefni og kennsla

2. Master Herbal Medicine - Grasalækningar; fjarnám, verkefni og kennsla

3. Master Naturopathy - hagnýtar náttúrulækningar; fjarnám, verkefni og kennsla

4. Naturopathic Immersion - Samþætting allra þátta; fagleg og hagnýt kennsla vor og haustlotur

5. Divinty Touch Reflexology - Djúp-tengsla svæðanudd

6. Divinity Touch Essential Oils Therapy - Djúp-tengsla kjarnaolíunám

7. Flower Essence Practitioner - Blómadropar; Meðferð og notkun íslenskra náttúrudropa.

8. Living Food Lifestyle - Læknandi fæði

9. Purification, Regeneration and Transformation Retreat - upplifun og endurnýjun.

10. Lokaverkefni, skýrslur.

Í SNMÍ er litið er á manneskjuna sem þríþætta heild; líkama, anda og sál og bæði líkamleg og andleg heilsa skipta máli og að nemendur séu öðrum til eftirbreytni.

Með hugtakið innri vistfræði (inner ecology) að leiðarljósi og í jafnvægi við hina ytri vistfræði náttúrunnar (outer ecology), verður nemandinn fær um að leiða meðferð sem sem byggir á þremur grunnþáttum; hreinsun, uppbyggingu og umbreytingu (purification, regeneration, transformation) sem eru lykilhugtök í námi og kennslu SNMÍ. Áhersla er á lífsstíl og fæði og í náminu er m.a. námskeið í lifandi fæði og hreinsunar- og endurnýjunarnámskeið fyrir nemendur.

Við mælum eindregið með því að áhugasamir kynni sér vefsíðu skólans: www.purehealth.com.

Kennsla mun fara fram um helgar og síðdegis.

Gert er ráð fyrir að nemendur geti stundað vinnu með náminu.

Heildarkostnaður við námið er 16.000 dollarar og munu nemendur geta greitt námsgjöld með mánaðarlegum greiðslum.

Óskað verður eftir lánshæfi hjá Lánasjóði Íslenskra námsmanna.

Inntökuskilyrði

Formleg umsókn

Enska úr menntaskóla

Eigin heilsuvernd/heilsumeðferð í amk. 3 mánuði

Skilyrði til að útskrifast er að hafa setið kennslu og námskeið, að hafa lokið verkefnum og sjúkraskýrslum.

Að auki þarf eftirfarandi menntaskólafög; Líffæra- og lífeðlisfræði 1 og 2, Sjúkdómafræði og Siðfræði heilbrigðisstétta.

Námið er alþjóðlega viðurkennt nám og nemendur fá ND Naturopath Diploma.

Útskrifaðir Heilsumeistarar hafa rétt til að verða skráðir græðarar á Íslandi samkvæmt lögum um Bandalag Íslenskra græðara.

Umsjónarmenn námsins á Íslandi eru:

Lilja Oddsdóttir (848 9585) og Gitte Lassen (861 3174)

healthmaster.snmi@gmail.com

www.purehealth.comwww.purehealth.com www.purehealth.com www.purehealth.com

Blogg: http://www.independentlyhealthy.typepad.com/

Sumarið er tíminn

Sat, 09 Jun 2007 19:38:22 GMT

Ótrúlegt að það sé komið sumar enn eina ferðina. Mér finnst allt skyndilega vera orðið svo grænt og gífurleg gróðursæld. Hefði í raun átt að verða þrítug í dag ef mamma hefði átt á settum degi en ekki 6 dögum síðar :D Þannig að ég ætla að segja að ég eigi líka afmæli í dag, fyrsti í afmæli 8)

Arngunnur, Valli, Iðunn og Þorri kíktu í heimsókn í dag sem var í meira lagi fínt. Er ein heima um helgina þar sem Eggert er í veiðiferð og svo það var kærkomið að fá gesti. Annað kvöld verður svo afmælissaumaklúbbur, þar sem Ljósheimastelpurnar koma í smá kaffi til mín. Ég er nú þegar búin að halda eina afmælisveislu, því við systurnar buðum Ghettósaumaklúbbnum í smá veislu síðasta fimmtudag. Var það ferlega notalegt og vel mætt. Fengum þvílíkt grand gjöf frá skvísunum, eða sitthvort gjafabréfið í Kringlunni að andvirði 17.000 kr 8| Ég tók svo einn rúnt um Kringluna daginn eftir og eyddi 3000 kr af gjafabréfinu. Fékk mér geisladiskinn 100 vinsæl íslensk lög frá 1980-1989 :!: Skellti disknum í spilarann í bílnum (öllu heldur diskunum þar sem um 5 diska er að ræða) og vá hvað ég hló mikið. Þvílík nostalgía!!! Alveg ótrúlegt hvað hugurinn tengir sterkt við lög, um leið og ég heyrði hvern smellinn á fætur öðrum hrönnuðust upp hinar ýmsu minningar - allt frá gömlum tíma á Sauðárkróki til skíðaferðar á Akureyri, frá gömlum tímum í ghettóinu til djammsins á fullorðins árum. Dæmi um lög á disknum eru: Við eigum samleið með Stjórninni, Pamela með Dúkkulísunum, Kántrýbær með Hallbirni Hjartar, Út á gólfið með Hemma Gunn, Fatlafól með Bubba og Megasi, Týnda kynslóðin með Bjartmari Guðlaugs, Stolt siglir fleygið mitt og skrilljón í viðbót. Bara snilldar diskur 8) Ætli maður endi svo ekki á að bjóða skyldmennum í smá kaffiboð í kringum afmælið. Get þá notað afmælisgjöfina frá Eggerti sem ég fékk fyrirfram. Fékk nefnilega KitchenAid sem hefur verið draumur síðan ég var smá kríli :haha:

Fór á Laddi 6 tugur í vikunni og verð að viðurkenna að það var bara alveg ágætt. Þeir sem mig þekkja vita nefnilega að mér finnst Laddi ákaflega lummó og ófyndinn maður. Nota gjarnan frasann "Algjör Laddi" yfir fólk sem er að reyna að vera fyndið en tekst það ekki. Til að byrja með var ég alveg stíf og vogaði mér ekki að hlægja að neinu heldur var yfir mig hneyksluð á salnum sem lá í kasti svoleiðis að sætaröðin fyrir framan hristist og skalf. Ákvað svo að loosen up a little og gat þá skemmt mér stórvel. Er samt ekki tilbúin að ganga í einhvern Ladda-aðdáendaklúbb!

Have fun!

Salerni og sumarblíða

Wed, 30 May 2007 23:11:06 GMT

Jæja góðir hálsar, nú er loksins komið að því sem allir hafa beðið eftir - ný bloggfærsla frá mér er að í þann mund að öðlast líf. Eflaust margir sem hafa verið komnir með fráhvarfseinkenni 8)

Fór í skoðun í dag sem kom bara ljómandi vel út. Blóðþrýstingur fínn, eðlileg þyngdaraukning, hjartsláttur Ljónynjunnar ljómandi fínn, þvagið í góðu lagi og legbotninn mældist 33 cm (er komin sléttar 30 vikur í dag). Er með eilítinn bjúg en ekkert gífurlegan. Grindin er með skárra móti þessa dagana og ógleðin að dvína. Var svo send í blóðprufu til að mæla járnið. Annað skipti sem ég fer í blóðprufu niðri á Landspítala og í bæði skiptin lenti á nemum :) Þessi ætlaði aldrei að finna æðina og þegar hún loks fann hana stakk hún fram hjá svo nánast ekkert blóð náðist. Get ekki sagt að þetta hafi verið beint þægilegt.

Aftur á móti finnst mér ég vera orðin mikið þyngri á mér en áður. Á orðið erfiðar með allar hreyfingar og finnst ég þurfa að reyna virkilega mikið á mig til að komast milli staða. Seinnipart dags er ég svo undirlögð af samdráttum sem hverfa ekki nema ég leggist niður. Reyni því að vera dugleg að liggja sem mest þegar þeir eru verstir.

Nýttum síðustu helgi til að skreppa norður á Akureyri ásamt Jóhannesi, Herði og Agnesi Höllu. Það var núna eða aldrei...í það minnsta þetta sumarið :haha: Áttum rosalega notalega stund þar - kíktum í sund, fórum í Jólahúsið og höfðum það gott. Ef við hefðum haft einn dag í viðbót hefðum við komið við á Sauðárkróki. Hef ekki komið þangað í næstum 10 ár, eða síðan amma langa dó.

Annars erum við Eggert í miklum hugleiðingum hvernig við viljum breyta baðherberginu okkar. Hefur staðið til í góðan tíma að láta flísaleggja, fá okkur nýtt baðkar og sturtu. Vandamálið er bara það að við höfum svo ólíkan smekk 8| :haha: svo þetta mun reynast okkur erfitt. Meðan Eggert er hrifinn af íburði vil ég helst eitthvað látlaust og væmið. Hann myndi helst vilja marmara í hólf og gólf, útskornar eikarinnréttingar og látúnskrana sem spilar verk eftir Mozart þegar kveikt er á honum. Burknar í anda Viktoríutímans væru eflaust í hverju horni á hans draumabaðherbergi og þungir, íburðarmiklir speglar.

Ég aftur á móti er stödd á allt öðrum stað. Sé bara hvernig hann kyngir ælunni þegar ég bendi honum dreymin á hvern vaskinn á fætur öðrum, sem eru flúraðir blómamyndum. Mitt draumabaðherbergi er helst í væmnum Barbie-stíl, helst eins bleikt og hægt er. Veggirnir væru úr kandíflosi, blómaangan í loftinu, bleikt teppi á gólfinu og þegar skrúfað væri frá krönunum myndi liðast fölbleikt vatn úr þeim, helst með pínulitlum vatnaliljum í.

OK - ég ýki kannski aðeins í lýsingunum hér að ofan en er það nú bara gert til að undirstrika hve ólíkan smekk við höfum :P Því kom okkur reglulega á óvart í gær þegar við urðum svakalega hrifin af sömu gólfflísunum og gerðist svo aftur sá undirlegi atburður að við hrifumst af sama vasknum og skápunum í dag. Ætli þetta hafist ekki fyrir rest ;)

Kveð í bili frá Hamragili - verð örugglega orðin þrítug þegar ég blogga næst 8| sem er reyndar ekkert svo langt þangað til :!: